വെനസ്വേലയിലും ഉറുഗ്വേയിലും നടക്കാനിരിക്കുന്ന ലോകകപ്പ് യോഗ്യതാ മത്സരങ്ങള്‍ക്കുള്ള ബ്രസീല്‍ ടീമില്‍ സൂപ്പർ താരം നെയ്മറും എൻഡ്രിക്കും ഇല്ല.
സൌദി അല്‍ ഹിലാല്‍ ഫോർവേഡ് ആണ് നെയ്മർ. റയല്‍ മാഡ്രിഡിലാണ് 18കാരനായ എൻഡ്രിക്ക് കളിക്കുന്നത്.
32 കാരനായ നെയ്മർ പരിക്കിനെത്തുടർന്ന് ഒരു വർഷത്തോളം നീണ്ട ഇടവേളയ്ക്ക് ശേഷം ഒക്ടോബർ 21നാണ് അല്‍ ഹിലാലിനൊപ്പം കളിക്കാൻ തുടങ്ങിയത്. അയാളെ കൊണ്ടുവരേണ്ടതില്ലെന്ന് ഞങ്ങള്‍ തീരുമാനിച്ചതായി ബ്രസീല്‍ കോച്ച്‌ ഡോറിവല്‍ ജൂനിയർ പറഞ്ഞു. 2023 ഒക്ടോബർ 17നാണ് അദ്ദേഹം രാജ്യത്തിന് വേണ്ടി അവസാനമായി കളിച്ചത്. ആ മത്സരത്തിലാണ് ഇടത് കാല്‍മുട്ടിന് ഗുരുതരമായി പരിക്കേറ്റത്.
2025 മാർച്ചില്‍ കൊളംബിയയ്ക്കും അർജൻ്റീനയ്ക്കുമെതിരെ നടക്കുന്ന ലോകകപ്പ് യോഗ്യതാ മത്സരങ്ങള്‍ വരെ നെയ്മറിന് ദേശീയ ടീമില്‍ തിരിച്ചെത്താൻ കാത്തിരിക്കേണ്ടിവരും. കഴുത്തിന് പരിക്കേറ്റ റയല്‍ മാഡ്രിഡ് ഫോർവേഡ് വിനീഷ്യസ് ജൂനിയർ ഒക്ടോബറിലെ യോഗ്യതാ മത്സരങ്ങള്‍ നഷ്ടമായിരുന്നു. അടുത്ത മത്സരങ്ങളില്‍ അദ്ദേഹം കളിക്കും