വിസ്താരയുടെ ലയനത്തെത്തുടര്‍ന്ന് ടാറ്റ ഗ്രൂപ്പിന്റെ ഉടമസ്ഥതയിലുള്ള എയര്‍ ഇന്ത്യയില്‍ സിംഗപ്പൂര്‍ എയര്‍ലൈന്‍സ് (എസ്‌ഐഎ) 3,194.5 കോടി രൂപയുടെ അധിക നിക്ഷേപം നടത്തുമെന്ന് റിപ്പോര്‍ട്ടുകള്‍. 2022 നവംബര്‍ 29-ന് പ്രഖ്യാപിച്ച ലയനം 2024 നവംബറോടെ പൂര്‍ത്തിയാകുമെന്ന് പ്രതീക്ഷിക്കുന്നതായും റിപ്പോര്‍ട്ടില്‍ പറയുന്നു. വിപുലീകരിച്ച എയര്‍ ഇന്ത്യയില്‍ സിംഗപ്പൂര്‍ എയര്‍ലൈന്‍സിന് 25.1 ശതമാനം ഓഹരി നല്‍കും.
2015 ജനുവരിയില്‍ പ്രവര്‍ത്തനം ആരംഭിച്ച വിസ്താര ടാറ്റ ഗ്രൂപ്പും സിംഗപ്പൂര്‍ എയര്‍ലൈന്‍സും തമ്മിലുള്ള സംയുക്ത സംരംഭമാണ്. എസ്‌ഐഎയ്ക്ക് 49 ശതമാനം ഓഹരിയുണ്ട്. എസ്‌ഐഎയ്ക്ക് വിസ്താരയിലെ 49 ശതമാനം ഓഹരിയുടെ പലിശയും സംയോജിത എന്റിറ്റിയിലെ 25.1 ശതമാനം ഇക്വിറ്റി ഓഹരിക്ക് 2,058.5 കോടി രൂപ (എസ്ജിഡി 498 മില്യണ്‍) പണമായും ലഭിക്കുമെന്നാണ് ലയന കരാറിലുള്ളത്.ലയനം പൂര്‍ത്തിയാകുമ്പോള്‍, SIA ഏകദേശം SGD 1.1 ബില്യണ്‍ ഗുഡ് വിൽ നേട്ടങ്ങളും രേഖപ്പെടുത്തുമെന്നാണ് പ്രതീക്ഷ. ലയനം പൂര്‍ത്തിയാകുന്നതിന് മുമ്പ് ടാറ്റ ഗ്രൂപ്പ് എയര്‍ ഇന്ത്യയ്ക്ക് നല്‍കുന്ന ഏത് ഫണ്ടും എസ്‌ഐഎയ്ക്ക് സംഭാവന ചെയ്യുന്നതിനുള്ള കരാറും അതിന്റെ 25.1 ശതമാനം ഓഹരി നിലനിര്‍ത്താന്‍ 5,020 കോടി രൂപ വരെയുള്ള അനുബന്ധ ഫണ്ടിംഗ് ചെലവുകളും ലയനത്തില്‍ ഉള്‍പ്പെടുന്നു.
എയര്‍ ഇന്ത്യയ്ക്കുള്ള ടാറ്റയുടെ മുന്‍കൂര്‍ ഫണ്ടിംഗ് അടിസ്ഥാനമാക്കി സിംഗപ്പൂര്‍ എയര്‍ലൈന്‍സിന്റെ അധിക മൂലധനം 3,194.5 കോടി രൂപയാണ് പ്രതീക്ഷിക്കുന്നത്. ലയനം പൂര്‍ത്തിയായ ശേഷം ഈ നിക്ഷേപം നടത്തുമെന്നും എയര്‍ ഇന്ത്യയുടെ പുതിയ ഷെയറുകളിലേക്കുള്ള സബ്‌സ്‌ക്രിപ്ഷന്‍ വഴി 2024 നവംബറിനുള്ളില്‍ ഇത് സംഭവിക്കുമെന്നും കമ്പനിയുടെ പ്രസ്താവനയില്‍ പറയുന്നു. ലയനത്തിന്റെ ഭാഗമായി എയര്‍ ഇന്ത്യയും സിംഗപ്പൂര്‍ എയര്‍ലൈന്‍സും അടുത്തിടെ തങ്ങളുടെ കോഡ്‌ഷെയര്‍ കരാര്‍ വിപുലീകരിക്കാന്‍ തീരുമാനിച്ചിരുന്നു. 11 ഇന്ത്യന്‍ നഗരങ്ങളും 40 അന്താരാഷ്ട്ര ലക്ഷ്യസ്ഥാനങ്ങളമാണ് ഇവരുടെ നെറ്റ്‌വര്‍ക്കിലേയ്ക്ക് ചേര്‍ത്തിരിക്കുന്നത്.
സിംഗപ്പൂര്‍ എയര്‍ലൈന്‍സ് സാമ്പത്തിക വര്‍ഷത്തിന്റെ ആദ്യ പകുതിയില്‍ അറ്റാദായത്തില്‍ 48.5 ശതമാനം ഇടിവ് രേഖപ്പെടുത്തിയിരുന്നു. കഴിഞ്ഞ വര്‍ഷം ഇതേ കാലയളവിലെ SGD 1.44 ബില്യണില്‍ നിന്ന് SGD 742 ദശലക്ഷം ($561.65 ദശലക്ഷം) കുറഞ്ഞു. നല്ല രീതിയില്‍ യാത്രാ ഡിമാന്‍ഡ് ഉണ്ടായിരുന്നിട്ടും പണപ്പെരുപ്പ സമ്മര്‍ദങ്ങള്‍, ജിയോപൊളിറ്റിക്കല്‍ ഇഷ്യൂസ്, വര്‍ദ്ധിച്ചുവരുന്ന ചെലവുകളൊക്കെ എയര്‍ലൈനിന്റെ പ്രകടനത്തെ ബാധിച്ചിരുന്നു.