കൂത്തുപറമ്പ് : വയോധികയുടെ മാല പൊട്ടിച്ച കേസിൽ കൂത്തുപറമ്പ് നഗരസഭ കൗൺസിലർ പിടിയിൽ. നാലാം വാർഡ് സിപിഎം കൗൺസിലർ പി പി രാജേഷാണ് അറസ്റ്റിലായത്.
കഴിഞ്ഞ വ്യാഴാഴ്ച ഉച്ചയ്ക്ക് 12 മണിയോടെയാണ് സംഭവം. കണിയാർകുന്ന് സ്വദേശിയായ ജാനകിയെന്ന വയോധിക അടുക്കള ഭാഗത്തിരുന്ന് മീൻ മുറിക്കുന്നതിന് ഇടയിലാണ് കവർച്ച.
പിറകിലൂടെ വന്ന് കഴുത്തിൽ പിടിച്ച ശേഷം ഒരു പവനോളം തൂക്കം വരുന്ന മാല പൊട്ടിക്കുകയായിരുന്നു. പിടിവലിക്കിടെ മാലയുടെ ഒരു കഷണം നിലത്ത് പൊട്ടി വീഴുകയും ചെയ്തു.
ജാനകിയുടെ നിലവിളി കേട്ട് ബന്ധുക്കളും അയൽവാസികളും സ്ഥലത്ത് എത്തിയതോടെ ഇയാൾ രക്ഷപ്പെടുകയായിരുന്നു.
പാന്റും ഷർട്ടും ഹെൽമറ്റും ധരിച്ചിരുന്നു എന്നത് മാത്രമായിരുന്നു പ്രാഥമിക വിവരം.
കവർച്ചയ്ക്ക് ശേഷം സ്കൂട്ടിയിലാണ് പ്രതി രക്ഷപ്പെട്ടതെന്നും വയോധിക പറഞ്ഞിരുന്നു. തുടർന്ന് സിസിടിവി ദൃശ്യങ്ങൾ ഉൾപ്പെടെ കേന്ദ്രീകരിച്ച് നടത്തിയ അന്വേഷണത്തിലാണ് രാജേഷ് പിടിയിലായത്.